حوار مع المصمم إبراهيم حمدي

1. ممكن تعرفنا بنفسك

ابراهيم حمدي، 22 سنة ، مصمم جرافيك وتيبوجرافر ، من الاسكندرية وعايش دلوقتي في القاهرة، خريج معهد نظم ومعلومات،

 

2. كيف كانت بدايتك فى هذا المجال؟

المجال ابتديت فيه كهواية وطبعا مستوى متخبط وضعيف ومع الوقت بدأ التطور خطوة بخطوة، اول حاجة احتكيت بيها ف المجال كانت برنامج الفوتوشوب 7، كان اخويا الكبير بيشتغل عليه ويركب صور، ولما اعجبت بالبرنامج خلاني اتعلم عليه وجابلي فيديوهات شرح للبرنامج رغم انها كانت عقيمة بس كانت بداية كويسة بالنسبة بالي ف المجال وهيا سبب اني اتعلق بيه واحبه .

 

3. ولما اخترت هذا المجال تحديدا؟

مفيش سبب معين بس هو اعجاب بموضوع الصور وتركيب الصور والالوان وتصميم الخلفيات وبدايتي كانت مع تصاميم الكورة وخلفيات الكورة، واني حبيت المجال فكان لازم اكمل فيه، واعافر واحاول اتعلم رغم انتقادات الاهل والمعارف باني بضيع وقت ع الفاضي .

 

4. ماهى الادوات التى تستخدمها فى اعمالك؟

بشكل اساسي البن تول هيا مسقط راس اي مصمم محترف . اداة ابداعية وقوية سواء ف الاليستراتور او الفوتوشوب لا يمكن الاستغناء عنها .

طبعا فيه ادوات تانية بس انا اكتر اداة بحبها هيا البن تول واقوي اداة وبنفس الوقت صعبة وسهلة !

13b1ef1ba49b39a2a07cd5df93151587

 

5. ماهى مصادر الهامك؟

انا من قبل 5 شهور كنت دايما بشكل يومي بتابع بيهانس وكنت قبل ما اشتغل في مشروع لازم اتفرج على الشغل اللي معمول في نفس الموضوع بحيث اني مكررش فكرة معينة معمولة من قبلي واني احاول استلهم فكرة مختلفة والوان مختلفة عن اللي اتقدم من مصممين غيري .

لكن الان انا لما احب اعمل لوجو معين مثلا بحاول استلهم بره الجرافيكس بشكل عام .. استلهام خارج نطاق الجرافيكس . حتي بيهانس لما بفتحه بفتحه لمجرد اني استعرض الجديد ومجرد اشباع للعين من اعمال الاخرين والاعجاب بها .. لكن ليس للاستلهام منها .

مفيش مصادر محددة بس المفروض عشان نوصل لمستوى شغل المصممين العالميين لازم نفكر بره الجرافيكس ومنستلهمش من الجرافيكس .

من حياتنا من البيئة اللي حوالينا .. من اشياء في تراثنا من تاريخنا .. في حاجات كتير ممكن نستلهم منها ونربطها بالجرافيكس وبتعتمد على مهارة كل مصمم في تحويل اشياء واقعيه وحقيقيه الي شيء مبسط نعبر عنه ف الجرافيكس .

 

6. ماهى الصعوبات التى واجهتك اثناء مشوارك وكيف تغلبت عليها؟

كانت صعوبات كتيرة اهمها هيا انك تشتغل في شركة وانت مش عندك خبرة وتنزل تدرب في شركات فترفضك لانك معندكش خبرة . طب هتيجي ازاي الخبرة وانا متحطتش في ظرف الشغل نفسه ؟ .. اديني فرصه اثبت وجودي ودي كانت صعوبة اني الاقي شركه تحاول تقتنع اني مصمم جيد واستحق فرصه للتجربة . ومش هعد اني سيبت ديفديهات كتير شغل فيها مفتوح عشان الشركات واصحابها يقتنعوا اني مصمم مش مجرد حد حمل ملفات مفتوحة وجاي يضحك عليهم بكلمتين .. ودي كانت غلطة ف مشواري اني اسيب شغلي مفتوح وامشي عشان محتاج فرصة .

 

من الحاجات التانية العملاء في الفري لانس .. في موضوع النصب ده حصل معايا كتير جداً ولسه بيحصل لحد دلوقتي ، وانه العميل يكلمك على شغل وتعمله وبعدين يختفي .، او انه يوافق ع الشغل وبعدين يختفي برضه ويقطع اتصالاته . شيء بيضايقني شخصياً

حاجة اخيرة هيا التعرض للسرقات وسحق حقوق المصمم باستيكة، شيء يخليك تفرح وتزعل بنفس الوقت انك بتبذل مجهود وناس تانية بتكسب منه على حساب تعبك .

af734d1a0c9c94363dd69bea87223e44

7. أي الأنظمة تفضل ويندوز أم ماك أم لينكس ؟

ماك .. جهاز فعلا للشغل بينجز وسريع وقوي .. لكني مازلت افضل الويندوز عشان بحب الجيمز ومش ناوي استغى عنه 😀

 

8. ماهى المواقع المفضله لديك والتى تتصفحها باستمرار؟

بيهانس، بين تريست .

 

 9. هل تفضل العمل بشكل حر ام لا ولماذا؟

انا بحب العمل الحر اكتر، عشان فيه حرية اكتر بتبقل المشروع اللي يعجبك بس دخله مش مضمون حتى العميل نفسه مش مضمون شهر ممكن يجيلك شغل وشهر ممكن ميجيش .. وكل ده ممكن يسببلك ازمات ف المعيشة . مجالنا له شقين هدف فني وهدف مادي والاتنين لايمكن الاستغناء عن واحد فيهم .

c0afd0b51a92c7fe6ee04ac0ad8d1d3d

10. اعطنا نبذه عن اسلوبك فى التصميم

ببساطة اسلوبي في التصميم ف الوقت الحالي، لمحه عن المشروع اللي هشتغل عليه .. بحث ف الانترنت عن ارتباطات المشروع ومنافسيه . استخراج افكار ثم اسكتشات ثم تنفيذ اكثر من فكرة اللي خرجت من الاسكتشات ثم تفنيش العمل .. طبعا فيه افكار ممكن تجيلك بمجرد ما تمسك المشروع وفيه افكار ممكن تاخد وقت يوم يومين اسبوع حسب ماتكون معقدة او بسيطة بس محتاجة شوية مجهود .

 

11. من هم المصممين العرب أو الأجانب الذين يحذبون اهتمامك؟

مش حافظ اسامي بالظبط للاجانب بس انا اعرف اشخاص وهم اصدقاء ليا عرب ومصريين .

على سبيل المثال، كريم ادم، محمد عزت، طارق الزيني، حسن الدسوقي وده مصمم ويب وصديقي من غزة، احمد عبد الحليم جرافيك ديزاينر وويب، واسامي كتير واسف لو نسيت حد منهم بس دول اللي جم ف بالي دلوقتي .. .

 

 12. كيف ترى مستقبل التيبوغرافي فى الوطن العربى ؟

مش عارف الحقيقة بس اعتقد فيه تطور، ملحوظ بس بطيء مش قوي محتاجين مجهود كبير عشان نبين قوتنا ف المجال ده بالذات بما اننا مبنهتمش بالخط العربي من الاصل . عندنا ناس مهتمه بالمجال وناس عندها موهبة لو نموها اعتقد هيحصل تغيير كبير ف المجال ده، محتاجين الناس الموهوبة وبس لا مقلدين ولا سارقين . فقط الموهوبين .

e6334303c6b5f3c7040b7f815b9d7806

13. ماهى نصائحك للمصمم المبتدئ؟

مفيش مانع انك تقلد عشان تتعلم بس نشرك للي انت قلدته هو ف حد ذاته سرقة، قلد واحتفظ بيه لنفسك وخد راي اقرب الناس اجتهد كتير واتفرج وحاول تشبع عينك بالالوان والافكار .. اسمع مزيكا مختلفة حاول تغير من اسلوبك ف التصميم جرب تعمل اسكتشات باستمرار لازم محاولات في محاولات حتى تصل لمستوى تكون راضي عنه .. ومفيش حاجة مستحيلة المهم تجتهد وربنا هيوفقك مش هيخذلك .. خليك صبور مجالنا محتاج صبر ومحتاج خيال واسع خيال مبدع .. لا هو مجال سبوبه ولا بيزنيس هو ف الاول والاخر فن محترم قوي .. يحقق هدف مادي بطريقة مبدعه . وان شاء الله بالتوفيق .

 

14. ماهي أكثر اعمالك حبا الى قلبك والتي تفتخر بها؟

اول تيبوجرافي عملتها ونشرتها وهيا سبب تقدمي وقومت بالمشروع ده في ظروف نفسية صعبه ومحطمه لاسباب ما لكني نجحت بالفعل اني اوصل لمستوى اكون راضي عنه ..  شاورما كاونتر من المشاريع اللي احببتها .. خط لافا من الخطوط اللي عشقتها وانا بصممها بعيدا عن كوكن الاشهر وسط خطوطي .. وفيه مشاريع اخرى لن افصح عنها سترونها بنفسكم خلال الفترة الجاية المشاريع ان شاء الله .

11

15. ضع شئ للتواصل معك من خلاله ورابط صفحة اعمالك

اهلا وسهلا بكم في البورتفوليو بتاعي على بيهانس 

 

شكراً جزيلاً وسعدت بالمقابلة . بالتوفيق لنا جميعاً باذن الله

 

 

مقالات ذات صلة

11 تعليقات

  1. مصطفى وهبه
    19 أبريل,2014 في 3:46 م - Reply

    ادام الله عليك نعمه التوفيق دائما عزيزي ابراهيم 🙂

  2. نورا الجلاد
    19 أبريل,2014 في 3:50 م - Reply

    بارك الله فيك اخى ابراهيم وان شاءالله فى تقدم مستمر وربنا يوفقك لتحقيق أهدافك 🙂

  3. Ahmed Ali
    19 أبريل,2014 في 4:00 م - Reply

    ما شاء الله أعمالك أكثر من ممتازة.

  4. الحسن الدسوقي
    19 أبريل,2014 في 4:05 م - Reply

    ربنا معاك ياابراهيم ،، انت حد مجتهد ومبدع وخلوق 🙂

  5. ahmed wahba
    19 أبريل,2014 في 4:49 م - Reply

    ما شاء الله أعمالك ممتازة وبالتوفيق دائما ^_^

  6. SOUD
    19 أبريل,2014 في 4:51 م - Reply

    حوارك مميز جدا ومشوق
    ولكن كنت وانا اقرأ الحوار كنت منتظر منك الخلطة السحرية للبداية والتعلم والوصول الي الاحتراف
    فاتمني ان تخبرنا بمرحلة التعلم ؟؟ وبماذا كنت تركز في هذه المرحلة ؟؟ وما صعوبه المرحلة ؟؟
    تحياتي

  7. كريم أحمد
    19 أبريل,2014 في 6:13 م - Reply

    أستاذ ابراهيم شخص محترم وفنان وميدع بارك الله فيه .

  8. احمد جاد
    20 أبريل,2014 في 4:33 ص - Reply

    عسل يا ابراهيم :]

  9. احمد ماهر
    20 أبريل,2014 في 2:13 م - Reply

    بالتوفيق يا ابراهيم

  10. عمرو عابد
    20 أبريل,2014 في 7:26 م - Reply

    حوار رائع مع مصمم أكثر من رائع 😀

  11. Ibrahim Hamdi (IBRO.o)
    22 أبريل,2014 في 3:03 م - Reply

    اشكركم جميعا .. واتمني اكون قد وفقت الحمدلله وعلي الاقل حد استفاد من الحوار بشكل عام .
    شكرا لكم جزيلاً

اضف رد