مقابلة مع المصمم احمد جاد

في حلقة جديدة من لقاءاتنا مع أبرز مصممي العرب الشباب الذين نجحوا في لفت الأنظار اليهم والى أعمالهم وموهبتهم في مجال التصميم ، نلتقي اليوم مع المصمم الشاب احمد جاد.

1- قدم لنا نبذة بسيطة عن نفسك ، بلدك، عمرك ودراستك ، وعملك الحالي .

احمد جاد ٢١ سنة من بني سويف عايش في القاهرة. درست تجارة انجليزي ادارة اعمال وبتشغل مصمم جرافيك في شركه  YAT Communication في مصر وشغال في شركة في دولة الامارت بشكل جزئي ..

2- هل لنا ان نعرف كيف كانت بدايتك فى التصميم .ولما اخترت هذا المجال تحديدا ؟

الموضوع ابتدا معايا انا عندي موهبه الرسم قبل ما اشتغل علي الفوتوشوب في فتره اعدادي كنت برسم لوحات رصاص والوان ميه وموضوع الالوان كان مكلف في سني وقتها والفوتوشوب كان الخطوه اللي بعدها في فتره اولي ثانوي يعني سنه ٢٠٠٧ تقريبا وقتها كنت اول مره اشتغل فيها علي برنامج فوتوشوب وكان وقتها اصدار photoshop 6 حاجه قديمه كدا كنت جايبه من صديق ليا شغال في استديو.

والموضوع بالنسبالي كان بالظبط زي احساس متعه البلايستيشن وقتها للولاد اللي في سني وكانت بدايتي اني اعدل علي صوري زي بداية ناس كتير لحد ما دخلت الكليه واتعرفت علي ناس صحابي كانوا عندهم نفس الاهتمام وقدرنا نساعد بعض وبعدين بدايه دخولي الفيس بوك وقتها اتعرفت علي ناس كتيره في المجال واستفدت منهم كتير ولو لمجرد المشاهده وبعدين نزلت توتريالز وابتديت اتابع فيها عشان اقدر اطور نفسي وبعدها دخلت في مجال الشعارات وهكذا لحد اليوم ..

3- تقدر تقول لنا ايه هي الادوات التي بتستخدمها فى اعمالك ؟

pencil – sketch – photoshop – Illustrator – InDesign – Keynote

4- طيب بتستمد الهامك منين ؟

اكيد البيئة المحيطة بأي شخص هي اكبر مؤثر عليه ، مش في مجال التصميم بس ولكن في كمان شخصيته . فالبيئة شئ اساسي.

واكيد متابعة المواقع المتخصصة زي behance , deviantart , pinterest.

5 -ايه هي اشهر اعمالك وانجازاتك ؟

هو اي عمل بعمله بيكون انجاز شخصي بالنسبة ليا افتخر بيه . لكن في بعض الاعمال بتكون قريبه من قلب اللي بيصممها زي :

١- YAT Learning Centers Rebranding

احمد رجب

٢- Egyptian karate federation

مقابلة مع مصمم الشعارات المصري احمد جاد

٣- Belmasry Akon festival

مقابلة مع مصمم الشعارات المصري احمد جاد

6 – من خلال تجاربك ومشاهداتك للمصميمن الآخرين ، بالتأكيد عندك رسالة تحب توصلها ليهم ؟

اه احب اوجه المصممين خصوصا الشباب من سني واصغر مني ….

اولا متستعجلش الشغل او الجانب المادي ، اشتغل على نفسك وطور من نفسك والفلوس هتيجي قدام ان شاء الله يعني ميكونش اتجاهك مادي اكتر منه  فني، انت فنان حتي لو كنت لسه هاوي ودي نصيحة خدتها من ناس اكبر مني . وكمان تقدر تطور نفسك يعني عن طريق انك تتفرج علي اعمال كتيرة وحاول تجرب.

اما الحاجة التانية متحاولش تهتم اكتر بترتيب بيهانس او بعدد المتابعين ليك لان دا فعلا مش مقياس لنفسك وشغلك هو اللي هيتكلم عنك فعلا !

 

اما نصيحتي بالنسبه لتصميم الشعارات ….

لازم في البداية تكون فهمت المطلوب من العميل ، جمعت معلومات كافية عن نوع المجال اللي شغال فيه ونوع الشعارات والالوان المفضلة ليه وهكذا .

تاني حاجة تبحث انت في المجال الخاص بالعميل وتبتدي تبحث عن لوجوهات لنفس مجال العميل ودا عشان تتلاشي فكره انك تصمم حاجة مشابهة. وكمان تشوف تفكير المصممين وصل لايه قبلك وحاول تضيف انت الجديد وحاول علي قد ما تقدر متتأثرش في تصميمك باللي شوفته وبعدين قلم واسكتش وابتدي خطط ودي خطوة مهمة في بعض المصممين بيلغوها وبيبتدوا ديجيتال وبعدين طبعا الاليستريتور او الكوريل حسب كل مصمم وطريقته وبتبتدي التصميم بلون اسود او علي الاقل درجتين وفي الاخر طبعا العرض الكويس ..

7 -من اعمالك يتميز اسلوبك بشيء من البساطة  ، كلمنا عنه ؟

اكيد مفيش اجمل من البساطة وانك تقدر تقدم فكرة واضحة بشكل بسيط وهي دي القوة وانا شخصيا بحب جدا نوع الشعارات الفلات Flat Logos .

حاجة كمان مهمة بالنسبه لاي مصمم ازاي تقدر تعرض الشغل دا بشكل قوي ودي حاجة انا بهتم بيها جدا لان طريقة العرض حاجة خصوصا وانت بتعرض قدام العميل وازاي بيستقبلها وهي بشكل كويس علي عكس انك تقدمها بشكل هو يحس فيه بأنه قيمته قليلة. هو أكيد العرض مش هيحلي شغلك لكن زي ما بيقولوا احلي ما في الشغل الشكل النهائي ليه.

8 – كلمنا عن اكثر الاعمال المفضلة ليك .

YAT Learning Centers Rebranding

شركه يات تدريب او يات كوينيكيشن هي شركة معروفة شوية بالنسبه لفئة الشباب , وهي موجودة من عشرين سنة تقريبا. ودلوقتي في حوالي 13 فرع علي مستوي الجمهورية وجالي في شهر 3-2013 بأني اعمل تصميم لوجو “يات” بشكل كامل . والحمد لله ربنا كرمني وصممته واتعرض علي مجلس الادارة واخدت موافقة في شهر 10-2013 .

والان في تخطيط حمله اعلان الشعار من خلال المؤسسة والجميل في الموضوع انهم مصممين كبار وارت ديركتورز ولهم مني كل تقدير هما استاذتي كان اتطلب منهم تصميم نفس الشعار فالموضوع بالنسبالي كان تحدي وتشويق !

مقابلة مع مصمم الشعارات المصري احمد جاد

مقابلة مع مصمم الشعارات المصري احمد جاد

مقابلة مع مصمم الشعارات المصري احمد جاد

9 – من خلال سنوات عملك بالتأكيد اكتسبت بعض الخبرات التي اصقلت موهبتك وساهمت في شهرتك … كلمنا عنها .

بالنسبه لخبراتي اكيد مش هتكون مكتسبة من سنين كتيرة حتي انا لسه سني مش كبير لكن خلال اخر ثلاث سنوات وقت ما ابتديت ادخل مجال تصميم الشعارات حبيت المجال جدا فهو زي ما قولت لون مميز مش سهل انك تستمر فيه ويكون مطلوب منك تتميز خصوصا ان فيه عدد من المصممين المحترفين . وانا اللي اسعدني في بداية ما خدت اتجاه تصميم الشعارات اني الحمد لله عندي موهبة الرسم فكان ليها دور كبير جدا خصوصا في خطوة رسم الاسكتش ..

10- ايه اكتر الانظمة اللي بتفضلها وليه ؟

النظام المفضل ليا هو الماك طبعا .

انا جربت اشتغلت علي الويندوز وحاليا بشتغل علي ماك لانه نظام سهل وامن من الفيروسات مش مزعج في تنزيل النظام كل فترة وخسارة بيانات ودي حاجة مصممين الجرافيك مش بيفضلوها ، والنظام سريع جدا ..

 

11 -بالتأكيد فيه مصممين بتابعهم وبتابع اعمالهم  ..؟

اكيد زي :

higher

MariaGroenlund

RARRFC

prn

AHMED ABDELHAIM

alzeeny

ibrahim-hamdi

mohamedsalehshehata

ibrahimq

12 – ايه رأيك في مستقبل تصميم الشعارات في العالم العربي ، وهل ممكن ينافس الاجنبي في المستقبل ؟

اكيد ان شاء الله خصوصا في الوقت دا السوشيال ميديا بتقدم توعية بشكل عام وغير مباشر لاهمية الشعارات بالنسبة للعميل .

وكمان للمصمم فانه يقدر يطور نفسه ويعرض نفسه ودلوقتي في عدد كبير من المصممين العرب متخصصين في مجال تصميم الشعارات وسنهم صغير وفي تطور مستمر ودا مؤشر كويس عن مستقبل الشعارات وهينافس اكيد ان شاء الله .

13 – في النهاية ايه احدث مشروعاتك ….؟

انا الحمد لله انتهيت من تصميم شعار مؤسسة لشركة امارتية بريطانية وبمجرد ما انتهي من الحملة الخاصة بالشركة هنزلها هي والشعار في البرتفليو علي بيهانس

 

بنشكر جدا المصمم الشاب احمد جاد على وقته وجهده في اجراء الحوار معانا.

ولمتابعة اخباره واحدث تصميماته يمكنكم اتباع الروابط التالية :

facebook: A7MD.GAD

behance: ahmedgad

pinterest: a7mdgad

vimeo: ahmedgad

LinkedIn: ahmed-gad

مقالات ذات صلة

7 تعليقات

  1. عمرو عابد
    8 فبراير,2014 في 3:51 م - Reply

    مصمم متميز ولقاء مثمر …

    لكني اود ان اسأل ايه اكتر المعايير اللي بتهتم بيها …
    يا ترى الالوان ولا التيبوغرافي اللي بتستخدمه …. ؟ ولا فيه معايير تانية ؟

  2. Ahmed Abd El-halim
    8 فبراير,2014 في 5:04 م - Reply

    مقابلة اكثر من رائعة
    واحمد من المصممين الواعدين ما شاء الله ،، ربنا يبارك فيه ويزيده

  3. جابر جاد
    8 فبراير,2014 في 8:30 م - Reply

    ماشاء الله عليك يا أحمد ربنا معاك ويبعد عنك الحسد والغرور ويزيدك مواهب كمان وكمان ,,,,,,,,,,

    • جابر جاد
      8 فبراير,2014 في 8:43 م - Reply

      موقع هائل وجميل لأهتمامه بالمواهب الشابة المتميزة ولقاء غاية فى الروعة .

  4. Mohammed Mansour
    8 فبراير,2014 في 9:17 م - Reply

    ربنا يوفقك يا جاد وتستاهل ده وأكتر ودايما خليك واثق فى ان الله لا يضيع اجر من أحسن عمله .

  5. مصطفى وهبه
    9 فبراير,2014 في 9:02 م - Reply

    ما شاء الله يا احمد من نجاح لنجاح يا حبيبي 🙂

  6. zico
    25 ديسمبر,2015 في 2:56 ص - Reply

    ممكن اعرف احسن البرامج لتعليم الشعارات

اضف رد