حوار مع المصمم حسام رجب

1. ممكن تعرفنا بنفسك

حسام رجب سنيور جرافيك ديزينر فى شركة طارق نور – القاهرة والناس
24 سنة ودارس خدمة اجتماعية
من مواليد حى شبرا الخيمة

e0f50a4497c8e41b5a3ca72c392f49b4

2. كيف كانت بدايتك فى عالم التصميم, ولما اخترت هذا المجال؟

الصراحة زى اغلب مصممين الجرافيك واللى ابتدو فى المجال بالصدفة البحته
انا كنت بشتغل فى مكان ما وكان فى حد بيشتغل ع الفوتوشوب جمبى
مكنتش بعرف هو بيعمل ايه بس كنت مشدود انى اتفرج عليه من غير ما ابينلو دا تماما
وكنت بستنى لما هو يمشى واقعد مكانو اقلد كل حاجه هو كان بيعملها
وعمرى ما هنسى انى دوست زرار الباور علشان مكنتش عارف اخرج من الفوتوشوب
الصراحة انا مقدرش اقول انى اختارتو لانى كنت بجرب مش مقرر
يعنى انا اول مره نزلت فيها شغل انا كنت نازل اجرب نفسى مش نازل مقرر اكون مصمم
لكن مع مرور الوقت حسيت انى منفعش اكون اى حاجه غير انى اكون مصمم
وفعلا وجهت كل طموحاتى واحلامى جوا المجال وحلمت اكون فى مكان معين فى مستوى معين
وخطوه بخطوة وتوفيق من ربنا انتقلت لأماكن كتيره كنت بزيد فيها كل يوم خبرة فى المجال مع كل موقف وكل غلط بغلطو
ولسه بحلم اكون احسن واقوى ولسه بقول لنفسى فى كتير انا معرفوش

3. ماهى الصعوبات التى واجهتك اثناء مشوارك وكيف تغلبت عليها؟

– طبعا فى البداية انا كنت بادىء شغل فى المجال وانا سنى صغير مش كبير ففكرة انى اقنع اهلى ان شغلى دا مهم وليه لزمة
وانى مش بقعد ع الكمبيوتر العب زى ماهما لسه لحد النهارده مفكرين فدى كانت بالنسبالى ازمة طبعا
– تانى حاجه انى ازاى اطمن ان كونى مصمم دى حاجه تضمن مستقبل او كوظيفة ممكن واحد يعتمد عليها انو يفتح بيت
ولا انى بضيع وقت وخلاص . وطبعا فى الاول كان كل المصممين اللى حوليا دخلهم قليل وكنت بقول انها مش هى دى الشغلانه اللى ممكن تقوم بيت وعيلة ويكونو مبسوطين . لكن مع الوقت ومع التنقل من شركه صغيره لأكبر ولاكبر بدات افهم غير وبدات اشوف ناس مصممين بسم الله ماشاء الله عليهم . بدات اطمن وبدات افهم انى لازم علشان اقدر اكمل انى اكون فى مكان يضمنلى
انى مبضيعش وقت ع الفاضى . وسعيت والحمد لله ربنا وفقنى ان يكون ليا مكان فى شركة من ضمن اكبر الشركات فى الشرق الأوسط .

1ebe514b10d52d0db5280d3034806698

a446c51be5b760d6a38533f3133b75e8

4. عرفنا على مصادر الهامك التي تبدأ بها أي عمل لك؟

متهيقلى ان مصادر الالهام مش سر المصمم اللى ممكن يتسال عليه . لانى مقتنع ان مصادر الالهام للمصممين كلها واحده
وكل مصمم على حسب تخصصو بيكونلو مصادرو . لكن انا هتكلم عن نفسى انا ممكن بيهانس يكون هو الملجأ الوحيد
بحب اتفرج كتير قبل ما اشتغل ودى حاجه انا كنت ديما بنصح بيها صحابى ان الثقافه البصرية هتخلى زوقك حلو
انت لما بتشتغل خبرتك تزيد مستوى أدائك بيعلى لكن زوقك ونضافه عنيك فى الرؤية اللى هينميها هى ثقافتك البصرية
وبعد كدا ببدا ارسم على ورقة وقلم يمكن فى اوقات كتيره الناتج النهائى بيبقى مختلف تماما عن اللى راسمو ع الورق اصلا
لكن كفايه انك حطيت نفسك ع الإطار وبعدين جود برحتك والنتيجة اكيد هتكون مرضية ليك

5. أي الأنظمة تفضل ويندوز أم ماك أم لينكس ؟

ويندوز

2912244f219d646582fd696e5ba2a5bf

6. ما هي البرامج التى تستخدمها فى اعمالك؟

فى اعتقادى ان مصمم الجرافيك عندو ايدين لازم الاتنين يكونو بنفس القوة
ايد باص وايد بكسل
يعنى الفوتوشوب مع اى برنامج باص اذا كان الاليستراتور او الكوريل
وانا الحمد لله بشتغل ع التلاته كويس

7. هل تفضل العمل بشكل حر ام فى فريق بشركة و لماذا؟

انا احب اكون واحد ضمن فريق نعمل حاجه ضخمه
احسن ما اكون لوحدى واعمل حاجه صغيره

16c9ff1e53978b095f9060f22db02bb4

 

11111112

8. من هم المصممين العرب أو الأجانب الذين يحذبون اهتمامك؟

طبعا فى ناس كتيره انا اتعلمت ومازلت بتعلم منهم كتير حتى لو هما ميعرفوش وطبعا هما ناس كتيره بس خليني اختصر الاسامى فى : محمد عصام – طارق الزينيعابد مرزوق – ريم الشيخ – ضياء عبد الحميد – اسامة داوود
وفى ناس كتيره جدا اتعلمت منهم حاجات كتيره مهمة مش بس ازاى اكون مصمم كويس

9. كيف تري مستقبل التصميم في العالم العربي؟

متهيقلى انى واحد ضمن جيل فيه ناس بجد مش قليله ناس بجد متوقع لهم مستقبل هايل
وعلى يقين ان جيلنا احسن كتير من اللى فات لان احنا عرفنا واتربينا على وسائل التواصل والنقد والتعلم
فاكيد مستوانا هيكون اقوى كتير من ناس كانت معزولة عن المعرفة الجماعية
ومحدش يقدر ينكر ان احنا عندنا ناس بتفكر كويس جدا وناس بتنقذ كويس جدا جدا . واكيد هيكون لينا دور واضح فى مجال الجرافيك فى العالم العربى ونسبق كتير

10. ماهي أكثر اعمالك حبا الى قلبك والتي تفتخر بها؟

ممكن اقولك ع اللى بفخر بيه لكن من اكتر حاجه بحبها هى حملة السيسى ع التليفزيون طبعا مش لوحدى وانا واحد ضمن فريق عمل . بس الفكره نفسها انى بعمل حمله انتخابيه لرئيس جمهورية . علشان كدا مش بقول انها اكتر حاجه بحبها
لكن اكتر حاجه بحبها هو لوجو لاكاديمة نصار ودا كان لوجو فى مسابقة والحمد لله خدت مركز اول وخدت مبلغ محترم يمكن هو دا اللى مخليني احبو ;P

76cd57adade613f4d240c926bdbde5f8 (1)

aa8f10b08ded61ae0483936fa9e7ad65

11. المصمم المبتدئ الذى يشق طريقه ولا يعرف أى مجال يختاره ليتخصص فيه , بماذا تنصحه؟

خليك زى ما انت . خبطت فى كل الحيطان وادخل فى كل المجالات ودول هنا وهنا وهنا ومتحجمش نفسك فى حاجه واحده الا لما تحس انك بجد بدات تفهم بدات تعرف الفرق بين دا ودا ودا . ساعتها هتلاقى ايدك هتلاقى نفسك بتروح للى انت حابو بجد ووقتها هتكون اقوى حاجه عندك . لكن طول ما انت شايف اى حاجه بتتعلم هى مجرد تصميم ملوش تصنيف فخليك زى مانت خبطت وعيش ومسيرك تفهم .

12. فى وقت فراغك وبعيدا عن جو العمل, ماذا تفعل؟

انا عندى هوس بالفويس اوفر . بحاول اتعلمو كويس واتقنو علشان عاوز يكون ليا بصمة صوت معروفة عند الناس كلها ان شاء الله
وبتعلم ناى ولسه جديد جدا فى الموضوع
وبلعب جيم وطاوله وبحب السينما جدا

13. ضع شئ للتواصل معك من خلاله ورابط صفحة اعمالك

فى البداية بحب اشكر القائمين ع الحوار وتحياتى للجميع وتمنياتى بالتوفيق لكل الناس ان شاء الله

بروفايل الفيس بوك
facebook
معرض لبعض الاعمال
behance

وشكرا ليكم

مقالات ذات صلة

10 تعليقات

  1. Mohamed Samy
    31 مايو,2014 في 1:52 م - Reply

    ما شاء الله .. شعارات رائعة .. أعجبني جدا شعار أكاديمة نصار للهندسة وفقك الله.

  2. محسن عامر
    31 مايو,2014 في 2:43 م - Reply

    ما شاء الله حوار رائع مع مصمم اروع 🙂

  3. Ahmed elrayes
    31 مايو,2014 في 3:34 م - Reply

    Rabena ma3ak ya m3lem

  4. نورا الجلاد
    31 مايو,2014 في 4:17 م - Reply

    اتمنى لك التوفيق ان شاءالله

  5. محمود عبدالتواب
    31 مايو,2014 في 4:47 م - Reply

    انا بجد استفدت من كلامك وانا مصمم. مبتدئ. ليه بخبط. يعني. :-). بحيك. وزعلان. منك. عشان. عملت. شغل للسيسي ف حملته 🙂 يغور. بفلوسه. :-).

  6. كورفا
    31 مايو,2014 في 4:51 م - Reply

    ههههههههههههههههه اكادمية نصار عشان خت فيها مبلغ محترم 😀 😀
    حبيبي يارجب والله ^^
    مشاء الله بجد علك

  7. ahmed hani
    31 مايو,2014 في 8:49 م - Reply

    و أنا خالتي كانت بتقول عليا بتاع كياس ،:-)

    • مصطفى وهبه
      1 يونيو,2014 في 12:51 ص - Reply

      🙂 و انا كنت بحلم و صحيت لقيتها ماشيه كده 🙂

  8. مصطفى وهبه
    1 يونيو,2014 في 12:49 ص - Reply

    بالتوفيق دوما عزيزي حسام 🙂

  9. اسامة داود
    1 يونيو,2014 في 9:21 ص - Reply

    حسام رجب موهبه محتاج الإنطلاق افكاره بتعجبنى روح العمل عنده ممتازه .. اعشق العمل معه كفريق عمل بنطلع حاجه ممتازه مع بعض الحمد لله 🙂