حوار مع الفنان محمد عمر

1 – أستاذ محمد حدثنا قليلا عن نفسك

اسمي بالكامل محمد احمد السيد عبدالغني عمر. من مواليد مدينة طنطا بالغربية .

مخرج حملات اعلانية ومتزوج مصممة جرافيك وعندي بنتين تسنيم 4 سنين وكارما شهرين

وانا بالثانوية العامه كان ليا اخ اتوفى عن عمر 24 سنه كان خريج علوم ازهر وعنده شركة كمبيوتر ب6 أكتوبر والوالد عمل حادث كبير في السنة اللي بعدها

رغم اني اعشق الرياضة الا اني دخلت كلية حقوق عشان افضل نقابة بعد المهندسين هي نقابة المحامين من حيث المميزات اللي بنحصل عليها من الدولة واتخرجت بتقدير جيد وعملت دراسات في الشريعه ومكملتش الماجيستر

رياضتي كانت الكارايتة ووصلت والحمدلله للحصول على بطولة الجمهورية اربع سنوات متتاليه واعتزلت محتفظ باللقب في 2004 وكان معايا 2 حزام اسود وعلى وشك الحصول على التالت

وشغال في مجال الجرافيك من 16 سنه واشتغلت منهم 6 سنين بالخليج في دبي وابوظبي والسعودية وابتديت من مساعد مصمم لحد ما وفقني الله للوصول لاكون مخرج حملات اعلانية

درست سنه دبلوم ميديا برودكشن ومخطط الفتره دي ان شاء الله فالحصول على اعتماد ادوبي كخبير واعتماد وزارة الاتصالات وعضوية بنقابة الفنانين التشكيليين

وهقدم السنه دي ان شاء الله على الدراسة المفتوحة لفنون جميلة اسكندرية او فنون تطبيقية اكتوبر

 

2 – كيف كانت بدايتك فى هذا المجال ؟ ولما اخترت هذا المجال تحديدا ؟

لما دخلت الاعدادي في سنه اولى كان في المدرسة معمل مناهل المعرفة وكنت في الفسحه بدخله واقعد على الكمبيوتر على برنامج الرسم ولما رسمت تورته كامله عليه ومتزوقه وبشمعها الاستاذه المسئوله عن المعمل شافته وعجبها وقعدتني علي التابلت اللي بقلم ضوئي مره كل اسبوع وكان التابلت الوحيد في الغربية

كنت بحب الصلصال جدا ياما خلصت مصروفي عليه وكمان اشتريت كراسة رسم وقلم وكنت لما بشتري كيس الاسناكس او الكاراتية مكنتش برميه وكنت بَعينه في جيبي ولما اروح اقلده لحد مقررت اقلد الموناليزا وكنت بسييح بمنديل ورق ومش عاوز اقلك بقا النتيجه اكيد انتا عرفت  .. ذكريات جميلة

المهم.. انا كنت بحب جدا اشتغل في الصيف ويكون معايا فلوس في جيبي من شغلى من اول 3 اعدادي وادخل كدا على والدتي بكيس الفاكهه فاشتغلت حاجات كتير من ضمنهم مساعد فني سلك سكرين قعدت فيها شهرين وانا في اولى ثانوي واشتغلت مندوب بيع لحد ما دخلت مكتب دعاية بعرض عليه البضاعة عرض عليا اخد شوية كروت اسوقهم معايا بالنسبه ووافقت وسوقتهم وبقيت اقعد جنب المصمم  وكنت بحس ان هوا دا اللي بدور عليه اللي هوا  بيعمله وسألته على حد بيعلم قالي على واحد صديق ليه اداني بدايات الفوتوشوب وبقيت باخد منه المحاضرة واشتغل في سايبر نت من بالليل للصبح عشان اطبق اللي اتعلمته عشان مكنش عندي كمبيوتر وكنت بلف اجيب كروت عشان اصممهم واجرب التصميم في الطباعة عشان اعرف هيكون شكله ازاي

وكنت بروح لواحد صاحبي شغال في استديو اتعلمت شوية اختصارات ومعالجة ألوان واحتراف البن تول

كنت بكره مهنة الفوتوميكر في الاستدوديوهات عشان الحرمانيه واخدت من صديقي الجميل سيد العدوي الحاجات دي ومشتغلتش في استوديو ومن هنا بدأت حياتي الفعليه مع مجال مصمم جرافيك دعاية واعلان بعد ما تعلمت مهارات البرنامج

نزلت في مطبعه واتعلمت المهارات التنفيذية في المجال وبعدها اشتغلت في مكاتب دعاية وكنت بقعد في المكتب لحد ما احس اني بقيت اعلى شخص فنيا فيه وبعده كنت بتنقل لمكان تاني اكبر عشان اتعلم مهارات اكتر وهكذا وطول الفتره كنت بحب حاجتين هما

ا– اتعلم باستمرار اي حاجة ليها علاقة بالمجال وكنت ممكن اسافر بعيد عشان اوصل لمعلومه لان مكنش فيه شبكات تواصل

2– مبخلش على اي حد بمعلومة مهما كانت شخصيته واسلوبه فالحياه .. ببساطه ربنا وهب لي علم ابخل بيه علي الناس يبقا ربنا حيحرمني من العلم دا .. واللي بيبخل دا بيكون فقير في معلوماته وشايفها بتميزه عن غيره  وخايف يقوله لتنتشر ويتساوى بغيره .. ودي رساله بخاطب بيها الزملاء ان تبادل الخبرات شيء مهم جدا وبيرفع المجال لانه بيرفع كل المنتمين للمجال وحضرتك متولدش عندك المعلومات دي دا ربنا للي سخرها ليك ويسرك للوصول ليها

ودايما بقول اللي بتعلم من المبتدئ

اكثر من المحترف لانه شغوف وحريص على اكتساب العلم في ظل التطور المذهل

اكمل .. بعد ما نزلت في اكبر مكاتب فطنطا ووفقني الله للوصول لاعلى مهنيه فنيه فيهم ربنا رزقني بالسفر فسافرت الي دبي واتعلمت التصميم بجد على ايد اجانب وعرب وشوية مقاييس دولية واسلوب عمل تقني بالاضافة لمهارات اخرى في التنظيم والادارة والتسويق وطرق المخاطبة والاقناع وبدأت اشوف عيوبي واحاول اصلحها على قد ماقدر ودا وصلني تدريجيا لمناصب اعلى بالمجال وخلاني اشتغل لشركات ومؤسسات عالمية  وابني اسم ليا في المجال وبعدها نزلت مصر في وكاله بالقاهرة في 2010 ومسكت فيها قسم التصميمات الفنيه وطبقت مجموعة نظريات اتعلمتها من الخارج ونجحت والحمدلله واكتشفت ان عيوب السوق المحلى بمصر في المجال ليه حلول كتير اغلبها في إيد الشخص الفني اللي هوا المصمم

وجبت الكتب الاكاديمية في كليات الفنون وبدأت اقراها واتطلع على مضمونها واتعلم منها كتيرعلى قد ماقدر وكل فتره باخد جزء واتطلع عليه

واخترت المجال بالتحديد لان مجال تصميمات الدعاية والاعلان اقوى واصعب مجال لاننا فيه بنوصل الراسالة بصوره صامته صعبة التعبير عن طريق التواصل البصري فقط فبيكون لينا فلسفه خاصة بخلاف الميديا والصوت والحركه

 

3 – ماهي البرامج والأدوات التي تستخدمها فى عملك

إليستريتور وفوتوشوب والاسكتش والقلم كأساسي

وكوريل وثري دي ماكس وافتر ايفكت وكلك وبربس وانديزاين  في اجزاء معينه فيهم
وممكن اتعلم اي برنامج يحتاجه شغلى او يساعدني على تنفيذ فكرتي

مش شرط نوعه ايه المهم هوا هيقدر يساعدني فعلا ولا لأ

شركة ادوبي قدرت انها تكون صاحبة الرياده والقوه لبرامج البعدين الاول والثاني وانا بستريح مع برامجها

 

4 – كيف تستلهم أفكار تصميماتك؟حدثنا عن مصادر الإلهام الخاصة بك

الطبيعة مصدر الالهام الاساسي للوجود

بالاضافة الى النظرة للشيء ولو كان ضئيل وتافه من وجهة نظر بعض الاشخاص بصوره مختلفة بعيده عن معناه الحقيقي وتقترب من المنطقية

 Web

 

5 – ماهي المعايير الأساسية التي تركز عليها فى تصميمك

مضمون الرسالة

 

6 – ماهو النظام التشغيل المفضل لديك ؟ولماذا تفضله؟

المنتشر والسليم طبعا ان الابل افضل من البي سي لكنى افضل البي سي بامكانيات عاليه  لان مكتبة البرامج بتاعتي بي سي  وعشان اقدر احل اي مشكلة في السوفت او الهارد وير ممكن تعطلني بحكم خبرتي فيه بخلاف الابل في الهارد والسوفت وير

 

7 – ماهى المواقع المفضلة لديك التى تتصفحها بإستمرار؟

جوجل وبيهانس

 

8 – هل تفضل العمل بشكل حر ام لا ولماذا؟

قبل ردي حابب اشكر ربنا انه اختص ذاته بنعمة الرزق وانها مش بإيد شخص يقدر يتحكم فيه وكل فرد ليه رزق بياخده ولا حيله في الرزق

بالنسبة لردي على السؤال فان العمل بشكل حر افضل لان تعبك بيكون ليك مش لغيرك وعلى قد تعبك واجتهادك على قد ما هتبني لنفسك اسم فالسوق

وعلى العموم الناس فالدنيا نوعين

نوع برا الدايره ونوع جوا الدايره

اللي برا الدايره دا بيحب يكون في امان ولما يجي عليه اول الشهر يلاقي معاه فلوس معينه عشان التزاماته الشهرية ودا اللي يهمه

انما اللي جوا الدايره عنده جراءه ومغامره وعاوز يبني لنفسه اسم وكيان يكون ليه ويبقي لاولاده وبيتعلم باستمرار عشان يكبر نفسه

 

9 – من هم المصممين الذين تتابع اعمالهم بإستمرار؟

اي مصمم شغله جميل ومؤثر حتى لو مش معروف او مبتدئ

 

10 – ماهي أكثر اعمالك حبا الى قلبك والتي تفتخر بها

اجتهد دائما في ان لا اخرج عمل من تحت يدي الا واكون راض عنه ولو بنسبة

الاعمال القريبة من قلبي هيا اللي بثبت بيها ذاتي وربنا كرمني وبنيت بيها اسم ليا

9c36258d0750fca97c0df2008bd9d883

 

11 – هل تجهز هذة الأيام لعمل دورة أو كورس في مجال التصميم؟

الحمدلله ربنا كرمني وقدرت اقدم كورس الفوتوشوب مجانا علي النت مشروح فيه كل جزء في البرنامج من الالف الى الياء على 30 محاضرة الناس تستفيد بيه بالذات اللي مش قادر ياخد كورس ولقلة جودة كل كورسات الفوتوشوب الموجوده في الوطن العربي

ولا كان في دماغي ان كورس الفوتوشوب هيكون الافضل في الوطن العربي والله انا كان كل اللي في دماغي ان الناس تتعلم صح وتستفيد صح مش اكتر وموجود عندي على قناتي في الرابط دا

Adobe Photoshop CS6 Advanced Course l Mohammed 3omar

وان شاء الله بجهز لدبلومة الحقبة الابداعية بمعايير عالمية .. الدبلومة المكثفة والمدعمه

بالاسكندرية عشان تخدم مصممين بحري ، وبالقاهرة عشان تخدم مصممي القاهرة والجيزة ونواحيها

وتكون دبلومة القاهرة اخر محطة للمستوى الاول اللي لف محافظات دولة مصر بعد ما تمت

ببورسعيد لتخدم مدن القناة ونجحت والحمدلله

وبالاقصر لتخدم وجه قبلي ونجحت والحمدلله

وبطنطا لتخدم مدن الدلتا ونجحت والحمدلله

لتعليم اسس بناء التصميمات والعلامات التجارية والحملات الاعلانية والتعرف على بعض الفنون واسلوب المعالجة والدمج

دبلومة اكبر واهم من ان المصمم يتعلم برنامج ودا اللي محتاجة مجتمع المصممين الفتره دي

وعلى فكره اللي عاوز يتعلم اي برنامج يقدر يشتغل عليه بسهوله لان اغلب برامج الجرافيك بقت شبه بعض ودخول البرنامج والطلوع منه بقا اسلوبه شبة واحد في كل البرامج يعني مثلا انا اتعلمت الاليستريتور واحترفته من غير فيديوهات شرح او كورسات والحمدلله

12 – ماهي نصائحك للمصممين؟

اتعلم باستمرار واشتغل على احدث اصدار ومتستهونش بالمعلومة وركز فيها واتعب عليها

احنا كنا بنسافر ونتعب عشان نوصل للمعلومة ويا إما وصلنلها يا إما لأ عشان كدا كانت بتثبت في الدماغ

التواصل دلوقتي خلاكوا تقدروا بسهوله تتواصلوا مع مصممين عالميين كنا بنسمع عنهم بس

وكمان تقدر بسهوله تتعلم اي برنامج او تحل اي مشكلة تقابلك من عالنت

السهولة الكويسة دي للاسف افقدت اهمية وقوة المعلومة لسهولة الوصول ليها دون تعب لدرجة انك ممكن تأجل الاطلاع عليها لاي وقت لمجرد انك ضامن انها متوفره عالنت

واتعلم باستمرار عشان لما تكبر يكون عندك اساس قوي يوقفك صح  فسبحان الله دي سنة الحياة الكبير بيمشي عشان الصغير يكبر

والحياه أيامها مبتوقفش فإن لم تكن في زيادة فأنت في نقصان

 

13 – حدثنا قليلا عن فكرة ملتقي المصممين المصريين؟

سؤال جميل .. الملتقى بإذن الله بعتبر خطوه اولى لتجمع كل مصممي دولة مصر على استراتيجيه واحده هدفها من الدرجه الاولى تنمية مهارات المصمم والمخطط له بإذن الله

الجزء الاول: الملتقى حيكون سنوي في ميعاد ثابت لكل مصممين مصر

وكل شهر حيكون فيه ملتقى في كل محافظة في مصر خاص بمصممين المحافظة فقط من بحري للصعيد

والملتقى هيفتح باب لتسجيل محاضرين تابعين له هيسجلوا اسماءهم عشان يقدموا كورسات  للمصممين بكل محافظة بتكلفة مدعمه

وهيوفر الملتقى لجنه لتنمية مهارات المحاضرين للوصول لاعلى جوده من المهنيه والحرفيه في توصيل المعلومه للمستقبل عن طريق تبادل الخبرات بين المحاضرين

الملتقيات بالمحافظات حيساعدوا ان المصممين يتعرفوا على بعض ويتبادلوا خبراتهم

الملتقى هيقدم ورش عمل للمصممين خاصة بتنمية الموارد البشرية والتسويق

نجاح الفكر دا بإيمان كل مصمم بيه وهيكون للمجال كيان حقيقي لكل مصمم في مصر عشان نعالج سلبيات المجال

 

الجزء الثاني: هيكون في موقع خاص بالملتقى لكل مصممين مصر وحيكون 3 اقسام

القسم الاول خاص بجدول مواعيد واخبار الملتقى

القسم الثاني: خاص بمعرض لاعمال مصممين دولة مصر زي البيهانس مثلا

القسم الثالث: خاص بالتواصل بين عملاء ومصممين لبناء علاقة عمل متبادل بأجر

 

أؤمن جدا بإبداع وعقلية المصممين المصريين

وهذه تكون خطوه لوضع كيان لنا لا يستهان به ونسعى لان يكون بصفه قانونية رسمية ولم يقتصر على ان يكون نشاط فقط ولاسترداد ريادة المصممين المصريين بالعالم ووضع دولة مصر في الوضع الذي تستحقه بين دول العالم

 

14 – كيف تري مستقبل الجرافيك في الوطن العربي؟

ما شاء الله في تطور اسرع وتقدم مستمر مش مجرد موضه ليها وقتها وخلاص

كنا بنستنا الجديد كل سنتين دلوقتي الجديد يوم بيوم ودا بيجبرنا اننا نكون دايما على مستوى الحدث

لان مهنتنا بتجبرنا اننا نكون متطلعين على التحديثات باستمرار وخلتنا نتصنف اكتر في تخصص معين او جزء من تخصص معين

ودا شيء كويس في حد اعتقادي

 

15 – ضع شيئا للتواصل معك من خلالة ؟

facebook

youtube

about.me

behance

 

في النهاية احب ان اوجه الشكر لكم على هذا اللقاء الجميل

واتابع نشاطكم المثمر باستمرار متمنيا لكم مزيدا من التفوق والازدهار

تحياتي

اخوكم الفقير الى الله

محمد عمر

مقالات ذات صلة

11 تعليق

  1. Ahmed ragab
    5 أبريل,2014 في 12:25 م - Reply

    حوار رائع ومثمر

  2. نورا الجلاد
    5 أبريل,2014 في 1:27 م - Reply

    حوار رائع وجميل ماشاءالله .. ربنا يبارك فيك ويزيدك من العلم اكثر
    أرجو من الله لك التوفيق 🙂

  3. Mahmoud mohamed
    5 أبريل,2014 في 3:50 م - Reply

    فنان ومحاضر مميز جدا .

  4. حسين عمر
    5 أبريل,2014 في 4:46 م - Reply

    شكرا علي الحوار الرائع . انا متابع لكل شروحاتك علي اليوتيوب بجد مبدع.

  5. Soud
    5 أبريل,2014 في 5:07 م - Reply

    ماشاء الله انترفيو مميز
    يكفي ان يوجد لديك قصة كفاح تدرس وان يكون لك هدف من صغرك تسعي لتحقيقه
    ولاسف غير موجوده في الجيل الحالي من وطننا العربي
    نتمني لك المزيد من النجاح والازدهار

  6. محمد السعدني
    5 أبريل,2014 في 6:01 م - Reply

    أعجبني اصرارك وبحثك علي النجاح دائما بالرغم من كل العقبات حوار مميز جدا .

  7. مصطفى وهبه
    5 أبريل,2014 في 10:30 م - Reply

    بالتوفيق دوما عزيزي محمد . سدد الله خطاك .

  8. magico
    6 أبريل,2014 في 5:03 ص - Reply

    حوار راااااااااااااااااائع جدا يا استاذ محمد ربنا يوفقك يارب
    وبجد بشكر الاستاذ احمد رجب على المقابلات الجامدة جدا دى بالتوفيق للجميع ان شاء الله

  9. AHMED ELADAWY
    6 أبريل,2014 في 6:48 ص - Reply

    انا طالب من محافظه دمياط حضرت لعبد الله الفقير محمد عمر
    الفوتو شوب عمره ما كان فدماغى خالص ولا بحبه لانى مكنتش بفهم فيه حاجه و دوراته مكلفه جدا

    لحد ما حضرتله فى الكليه فى بورسعيد وكانت بمبلغ رمزى جدا 50 جنيه و كنا بنتريق اى دا وازاى وبالتمن دا
    محدش ردى انا قولت اجرب انا واشوف …

    بجد بامانه معرفناش نستفاد حاجه لان المكان كان مش مجهز لينا ولا عارفين نطبق
    لحد ما حضرتله فى

    نادى مهندسين ببورسعيد وشوفت انه كل دقيقه بيلف حوالينه كطلاب و يعملنا بنفسه حبيت الفوتو شوب
    وفهمت من استاذى محمد عمر ان هو بيوصل رساله وهى ازاى نكون مبدعين

    اشتريت لاب وبقيت بتعلم محاضرات بتاعته وبطبق و هو بيتابعنى

    الف الف مبروك يا استاذى على الحوار الجميل دا و كان الله فى عونك و فى عون اسرتك ……

    تلميذك

  10. المصمم ابراهيم عبد الراضى
    6 أبريل,2014 في 10:10 ص - Reply

    ماشاء الله عليك استاذ محمد اصرارك على تعلمك وتطويرك من نفسك شىء رائع
    ربنا يوفقك ويديك على قد تعبك ان شاء الله تيحاتى

  11. محمد سعودى عسقلانى
    6 أبريل,2014 في 7:02 م - Reply

    ماشاء الله عليك استاذ محمدعمر ربنا يوفقك ويديك على قد تعبك ان شاء الله تيحاتى